Вкупно 2.243 бесплатни легитимации за јавен автобуски превоз на лица со посебни потреби обезбеди Град Скопје со што целосно ја реализира годинашната Програма која предвидува вакви бенефиции.
Од поднесените 2.274 барања од 36 организации, утврдените критериуми ги исполнија 2.243 лица, 2.085 за бесплатни легитимации и 158 за бесплатни легитимации со придружба.
Како што соопшти Град Скопје, обезбедени се легитимации за повластен јавен автобуски превоз на лица со оштетен вид, лица со оштетен слух, лица со телесен инвалидитет, лица со интелектуална попреченост, бубрежно болни лица, како и инвалиди на трудот, инвалидски пензионери и воени инвалиди.
Вкупните средства потребни за реализирање на Програмата изнесуваат 31.218.504 денари. Целта на нејзиното спроведување е да се помогне во остварувањето социјална грижа на лицата со посебни потреби, подобрување на нивното движење во урбаната заедница и нивно олеснето вклучување во социјалните и во општетствени текови на животот.