Тројца гостиварци се приведени и задржани во полициската станица во Гостивар поради сомневање дека извршиле серијата тешки кражби во градот и околните населби.
Од СВР Тетово информираат дека денеска се приведени 25-годишниот С.С, 17-годишниот З.И. и 33-годишниот С.М. под сомнение дека се сторители на десетина кражби. При приведувањето, кај тројцата кои оперирале во група, пронајдени се разни алатки и предмети што ги користеле.
– Осомничените најчесто провалувале во куќи на времено вработени во странство, насилно отворајќи ги влезните врати или прозорците во приземјето и подрумските простории. По влегување во куќите, главно одземале телевизори, бормашини, моторни пили, брусилки и слични апарати, истакнуваат од СВР Тетово.
Според портпаролот Марјан Јосифоски, дел од одземените предмети се пронајдени и ќе им бидат вратени на сопствениците.
По целосно расчистување на случаите, против тројцата гостиварци ќе бидат поднесени соодветни пријави.
