Кумановската полиција во соработка со УЈП, Државниот пазарен инспекторат и Инспекторатот за труд, спроведе дводневна акција за контрола и претреси во три угостителски објекти во кумановско-ликовскиот регион.
Имено во објект во село Ваксинце се пронајдени шест државјанки на Република Албанија, додека во Мојанце и Слупчане се најдени четири пиштоли, како и кражба на електрична енергија во Рунице и Черкези.
-Полициските службеници во еден угостителски објект пронајдоа шест државјанки на Албанија кои ги забавувале гостите,пеејќи и танцувајќи, по што им се поднесени прекршочни пријави според Закон за странци, а по спроведената прекршочна постапка од страна на Основен суд се протерани од Македонија-изјави портпаролот на СВР Куманово, Валентина Николовска.
Во сите три објекти надлежните констатирале повеќе неправилности, во однос на нерегистрирани трговски друштва, неиздавање фискални сметки, непријавени работници, како и прекршоци по Закон за заштита од пушење, при што им се изречени казни од околу 12.000 евра како и забрани за вршење дејност во траење од 15 и 30 дена.
Елена Георгиевска
