Формирање општински бизнис совет кој ќе заседава еднаш месечно и ќе ги разгледува и решава проблемите на стопанствениците, ветија кандидатот за градоначалник од коалицијата „За подобра Македонија“, Зоран Ѓорѓиевски и носителот на листата Драган Петковски на денешната средба со стопанствениците од керамичката индустрија во Куманово.
– Постоечките фирми од Куманово се брендови не само во државата, туку и пошироко во регионот, така што нивното функционирање и зајакнување за нас е особено значајно, бидејќи придонесуваат за намалување на невработеноста, рече кандидатот за градоначалник, Ѓорѓиевски.
Преку остварените контакти со стопанствениците, додаде тој, ги согледуваме проблемите, а воедно нудиме решенија кои се во ингеренција на локалната власт.
Ѓорѓиевски за време на средбата со стопанствениците од чевларската индустрија од населбата „Карпош“ најави подобрување на инфраструктурата и одбележување на фирмите во индустриските зони Доброшане и Карпош, како дел од потребите на бизнисмените.
Кандидатот за градоначалник на коалицијата „За подобра Македонија“, на средбата со директорот на Агенцијата за вработување,Влатко Поповски посочи дека соработката со институциите е особено значајна за понатамошните насоки во процесот на намалување на невработебноста.
– Секој регион си има своја специфика затоа и овие средби со граѓаните се особено значајни за дефинирање на мерките кои ќе бидат полезни и за невработените и за работодавачите, рече Поповски.