Кандидатот за градоначалинк од коалицијата „За подобра Македонија“ Зоран Ѓорѓиевски и носителот на листата Драган Петковски денеска оставрија средба со стопанственици од чевларската индустрија и најавија дека во програмата, приоритет има економскиот развој на општината.
– Освен за пронаоѓање стратегиски инвеститори за технолошко развојната зона која многу ќе значи за градот и ќе ја намали бројката на невработени, заинтересирани сме и за проширување и обновување на постојните капацитети преку кои сме препознатливи во Македонија, рече Ѓорѓиевски.
Во програмата е предвидено, додаде, и формирање канцеларии со кои ќе се овозможи поддршка за заинтересираните стопанственици кои имаат идеи за развој на мали и средни претпријатија, а кои ќе овозможат намалување на невработеноста во општината.
Кандидатот за градоначалник од ВМРО ДПМНЕ го посети и Центарот за социјални работи каде лично се информираше за распределбата на владината помош за оштетените семејства.
– Вкупно 171 семејство доби првична парична помош за штетите од неодамнешните поплави во Куманово, а Центарот подели помош во облека и хигиенски средства. Најавена е и распределба на апарати за домаќинство, истакна Ѓорѓиевски.
При посетата на Центарот за вработување Ѓорѓиевски доби информации кои профили доминираат и како може да се помогне во преквалификација за полесно конкурирање на пазарот на трудот.
– Една од водечките работи за кои се залагаме е бројката на невработените да се намали, рече Ѓорѓиевски.