Република Македонија нема да дозволи да биде вовлечена во какви било нецелисходни надмудрувања и дебати кои имаат за цел да ја дефокусираат јавноста од суштината на нашите односи, а тоа е неопходноста од изнаоѓање решение за деценискиот спор кој нашиот јужен сосед ни го наметнува, решение на спорот за името.
Ова е став на македонската влада кој го пренесе портпаролот Александар Ѓорѓиев, по повод поедини актуелности поврзани со македонско-грчките односи и по зачестените изјави на претставници на грчката држава.
„Ние на односите со Грција и на спорот кој Грција го наметна пристапуваме одговорно и посветено, за нас тоа е важно прашање кое треба да се реши за да се овозможи наша интеграција и реализација на стратешките определби и за да се подобри состојбата на граѓаните на секое ниво“, рече Ѓорѓиев.
Тој ја повика Грција на конструктивен однос и позитивно насочување на енергијата.
„Подготвени сме за дијалог, за разговор, за аргументација, за средби на секое нивио, директни и под покровителство на ОН се со цел унапредување на нашите односи и надминување на отворените прашања“, вели портпаролот на Владата на Република Македонија“.