Портпаролот на Владата , Александар Ѓорѓиев на прес-конференција соопшти дека 132 основни и средни училишта во 49 општини низ Македонија ќе бидат реконструирани и реновирани за три години, за што Владата обезбеди 45 милиони евра или по 15 милиони евра за секоја последователна година, почнувајќи од оваа.
„Училиштата се определени преку јавен повик и преку нивна физичка проверка. Целта на проектот е да се создадат современи услови за настава во енергетски ефикасни училишта. Ќе бидат опфатени различни општини, независно од составот на населението или од политичката припадност на градоначалникот“, рече Ѓорѓиев.
Меѓу 132-те опфатени училишта, 11 се во Куманово, седум во Битола, шест во Гостивар, по пет во Охрид, Струга и Тетово, четири во Струмица, по три во Прилеп и Крива Паланка.