Најголем дел од 10.112 проекти предвидени со програмите на 70-те кандидати за градоначаници на ВМРО-ДПМНЕ и коалицијата „За подобра Македонија“, се однесуваат на подобрување, реконструкција и доизградба на патната мрежа во општините.
Како што рече денеска на прес-конференција Љупчо Георгиевски од ВМРО-ДПМНЕ, локалниот развој кој е директно зависен од добрата патна инфраструктура, останува еден од приоритетите.
– Како партија, изминатиов период за свој приоритет ја зацртавме обновата на локалната и регионална патна мрежа, како и изградбата и реконструкцијата на нови улици и булевари. Тоа се патишта кои најчесто се користат од граѓаните и од кои најмногу зависи локалниот развој. Благодарение на таквите инвестиции по подолго време голем број населени места добија асфалтирани патишта, а со тоа и непречена комуникација со градовите и центрите на општините, истакна Георгиевски.
Во програмите на кандидатите се предвидува изградба на нови патни правци меѓу кои пробивање и тампонирање пат од село Бохула преку село Радња до ски-центарот „Кожуф“, сообраќајна клучка на магистралниот пат Скопје – Гостивар кај село Брвеница, локален пат од М-6 до вештачка акумулација „Мантово“ (поврзување на општините Штип и Конче), локален пат за село Сарчиево, пат до манастирот Трескавец, локален пат Струмица – село Водоча – брана „Водоча“, локален пат село Сачево – ТИРЗ „Свидовица“…
Георгиевски посочи дека ќе се реконструираат и доизградат постоечките патни правци, регионалните Кавадарци – Мушов Гроб и Радовиш – Конче – Лубница и Анѓелци – Вељуса – Водоча – Баница, локалните село Лесковица и село Пиперово – М-6 – Неготино, Струмица – село Попчево, село Горно Оризари – Крклино во општина Битола, „Источна обиколница“ на Битола, како и патот Бошков мост – Гарски мост.
Програмите на кандидатите на ВМРО-ДПМНЕ и коалицијата „За подобра Македонија“ предвидуваат и огромен број проекти за реконструкција и асфалтирање улици, пробивање нови булевари и проширување на постоечките. Овие проекти, како што нагласи Георгиевски, ќе дадат силен поттик на локалниот развој.
– Веруваме во програмите на нашите кандидати и им даваме целосна поддршка. Тоа се дела кои ќе говорат за еден одговорен пристап и чесна работа во општините. Делата кои зад себе ги остава ВМРО-ДПМНЕ се одговор на барањата на граѓаните, но и влог за идните генерации, рече Георгиевски.