Газдата на фризерницата им уплаќал пари на сметка, па барал да му се вратат во кеш, обвинуваат ангажирани во проектот

Од:

Повеќе лица ангажирани во проектот на фирмата „В.Е.З. Трејд“, регистрирана со дејност „фризерски салони и салони за разубавување“, која добила грантови од 270.000 евра од Националната агенција за европски образовни програми и мобилност, преку писма уште лани во април ја алармирале директорката на агенцијата Димова за можни злоупотреби со парите.

„А1он“ дојде до овие писма, кои содржат обвинувања за пари исплатувани во кеш, нетранспарентност и немање увид во проектот финанисиран од Националната агенција, а кој го спроведувал сопственикот и управител на „В.Е.З Трејд“, Зоран Златковски.

Неколкумина ангажирани за „А1он“ тврдат дека побарале да бидат изземени од проектот поради сомнежи за незаконско работење, но никогаш не добиле одговор од директорката на Националната агенција, Лидија Димова.

Овие лица ангажирани во проектот побараа да останат анонимни, нивните имиња се познати на редакцијата на „А1он“, исто како и целокупната документација со која располагаат.

Во едно од писмата до Димова тие укажуваат дека не знаат кои обврски ги имаат во проектот, а Златковски им објаснил дека се дел од тимот поради компетентноста, нешто што се оценува и од евалуаторите, а влијае при грантирањето.

Еден од мејловите испратени во април 2019 до директорката Лидија Димова, која ја известуваат за можни злоупотреби на средствата кои Златковски ги добил

По скоро три месеци од укажувањата до Димова, за случајот е известена и Европската канцеларија за борба против измама (ОЛАФ) која е надлежна за истражување на злоупотреба на европски пари. Оттаму, одговорот е дека случајот треба да го истражуваaт домашните служби, затоа што сомневањето на злоупотребите не е поврзано со членови на институциите на ЕУ.

ОЛАФ посочува наводите за злоупотреби да ги проверат домашните институции

Не знаевме какви ни се обврските во проектот, ангажирани бевме поради стручноста

Во случајов, сомнежите за незаконско работење се поврзани со првиот проект за кој „В.И.З. Трејд“, фирма со основна дејност „фризерски салони“, чиј сопственик е Златковски, добива грант од „Еразмус+“. Тој е насловен како „Едукација за медиумска писменост во дигитално опкружување“, а одобрени се 55.627 евра. Со оглед на тоа што дел од тренинзите требале да се одржат во странство, според сведочењата на лицата со кои разговаравме, фирмата исплатила средства за патувањето кон еден од учесниците во проектот, со кого подоцна склучува договор.

Во дописот до директорката на Националната агенција, Димова, се наведува дека Златковски преку „В.И.З. Трејд“ исплаќа пари на трансакциската сметка на ангажираната, а потоа дел од нив бара да ги врати назад во кеш. За неговиот чин, Златковски му велел на ангажираното лице дека средствата треба да ги врати бидејќи не му следуваат, иако исплатата се совпаѓала со договорот кој го потпишале.

Димова била известена преку адвокати дека налицата ангажирани од Златковски им било барано пари исплатени на трансакциска да ги враќаат во кеш

„Бидејќи јас ги барав тие пари како што пишуваше во потпишаниот договор, тој ми рече дека нема да одам на оваа обука“, стои во едно од писмата.

Во одделен допис до Димова, од друго ангажирано лице, на директорката ѝ се посочува дека потезите на Златковски можат да ѝ наштетат на Националната агенција. Но, како и претходно, одговор и по година и половина, нема. Понатаму, во писмото се додава дека иако фигурирале во проектот, тие не знаеле кои се задачите што ги имааат, а Златковски, според писмото, им објаснил дека се ангажирани поради искуството што го имаат во областа на медиумите.

Инаку, евалуаторите на Националната агенција, во апликациите ја оценуваат и компетентноста на ангажираните лица, што потоа, влијае врз поените според кои се носи одлуката дали ќе се додели грант.

Друго од лицата кои барале изземање од проектот каде биле пишани од Златковски, посочило дека со него немало ниту договор за соработка

„Проектот во целост како и задачите и одговорностите од моја страна кон проектот никогаш не ги добив во целост, (и покрај настојувањата), туку изричито Златковски ми нагласуваше дека само фигурирам и немам други одговорности (што пред аплицирањето не беше случај, имено тој истакна дека сме му потребни поради искуството во областа медиуми, да аплицираме и да се работи на задачите кои ќе произлезат од проектот). Убедена сум, дека е невозможно било кого од НА да не го интересира како што вели тој, како се вршат и на кого плаќањата, кој учествува во проектот и каков е бенефитот од проектот“, стои во дел од дописот до кој дојде „А1он“.

Националната агенција и Димова добиле и барања за изземање на лица од тимот на проектот за кој фризерницата добила грант. Дел од причините се исти како оние во укажувањата испратени до Димова, а се додава и нетранспарентноста во комуникацијата и немањето заедничка соработка со Златковски. Тие велат дека и до ден денеска не знаат дали Националната агенција ги отстранила од проектот.

Димова: Јас не разговарам со вас!

Директорката на Националната агенција, Лидија Димова, наместо одговор на прашањата дали добила вакви писма со реакции и доколку да, зошто не одговорила на истите, рече дека не сака да разговара со нас и ни спушти слушалка.

„Не знам дали на нас ни треба толкувач за да се разбереме. Јас, не разговарам со вас, Кристијан, многу ми е жал. Пријатно“, рече таа.

Сопственикот на фризерницата „В.Е.З. Трејд“, Зоран Златковски прво одговори на повикот од „А1он“ и побара прашањата да му бидат испратени по електронски пат. Но, до моментот на објавувањето на сторијата, тој не одговори на нашите прашања, исто како ни на нашиот втор повик и на СМС пораката.

Фирмата В.Е.З Трејд ДООЕЛ, пред да се регистрира со дејност „фризерски салони и салони за разубавување“,е регистрирана како „трговија на мало со мебел, опрема за осветлување и други предмети за домаќинство“. Ова е уште еден од сомнежите, поради кој, дел од тимот се изземал и барал да се истражи случајот.

Претходна приоритетна дејност на „В.Е.З. Трејд“ била трговија на мало со мебел, опрема за освелтување и други предмети за домаќинствата во спцеијализирани продавници

Директорката на агенцијата Лидија Димова и сопственикот на „В.Е.З Трејд“ Златковски денеска излегоа со заедничко соопштение во јавноста во кое меѓудругото го обвинија порталот „А1он“ за презентирање „еднострани и непроверени факти, без запазување на стандардите на професионално новинарство и објективно информирање на граѓаните“.

За утре Димова закажа прес-конференција.

Би можело да ве интересира

Премиерот Заев ќе препорача разрешување на Лидија Димова

Жарко Настоски

Фризерницата добила пари иако била петта на ранг-листата

Кристијан Ландов

Заев ќе поддржи разрешување на Лидија Димова од етички причини

Ана Ололовска

ВИДЕО: Протест на ВМРО-ДПМНЕ против незаконско трошење на европските пари за образование

А1он

(ВИДЕО) Благајничката тврди дека Лидија Димова ѝ вршела мобинг: Имав притисок и од нејзина соработничка, со закани за убиство

Кристијан Ландов

Николовски: Институциите почнаа со проверки околу случајот со европските пари

Жарко Настоски