Митрополитот на Брегалничката епархија, господин Иларион денеска по светата архиерејска литургија и литија посветена Свети Никола, патрониот празник на Штип, одговарајќи на новинарско прашање за тоа дали се гледа себеси како иден администратор на Австралиско-новозеландската епархија, рече дека не размислувал за таа идеја.
– Јас како митрополит имам древна епархија, речиси цела источна Македонија и мојата ангажираност е тука кај моите луѓе во татковината односно во Брегалничката епархија. Тие спомнаа и побараа, но јас имам обврски во Брегалничката епархија и не би можел да прифатам, посочи г.Иларион.
Митрополитот на Брегалничката епархија нагласи дека Светиот архиерејски синод (САС) на Македонската православна црква – Охридска архиепископија е мирољубив и сака да има единство меѓу македонскиот народ.
– Нема потреба од нова хиротонија на архимандритот Никодим Царкњас сега засега, затоа што ние имаме епископи, кои што се без епархија, но останува САС да одлучи и да реши, доколку има потреба ќе се направи и тоа, рече г.Иларион.
По повод патрониот празник на градот Штип во Соборниот храм „Св. Никола“ со свечената литургија чиноначалствуваа митрополитот на Брегалничката епархија г.Иларион, митрополитот на Повардарската епархија г.Агатангел и епископот Јосиф.