Ова е патот по кој секојдневно деца од скопско Крњево одат до училиштето Лирија. Змии, смет, шприцеви, стара облека, дотрајани кревети, пластика. Се е затрупано со нечистотија и се шири смрдеа.
Пет години откако се поставени направите за рекреација, никој ништо не презел за да се расчисти просторот.
Ова е само една од неколку депонии во Крњево. Жителите многу пати за овие години на градските и општинските власти им се пожалиле, но сликата само се влошувала.
Градоначалникот на општина Центар, Андреј Жерновски, кој вечерва дојде да ги слушне проблемите на жителите на Крњево, јасно порача:
„Ова мора да се реши. Вакви депонии не смее да има во Центар“.
Жителите побараа решавање и на проблемот со булеварот Крушевска Република и забрзување на постапките за легализација на дивоградбите.
Им беше посочено дека се работи со полна пареа, дека службите ќе се зајакнат за да се решат случаите, но дека има заостанато околу 5.000 предмети. 
„Ниту еден жител на Центар не е вратен. Вратите се секогаш отворени“, рече раководителот на Секторот за урбанизам.
Жерновски со своите соработници ги сослуша и договори средби за пронаоѓање на напластените и горливи секојдневни проблеми. Еден од нив и секојдневните кражби . Пријавите во МВР се уште не вродија со плод.
И децата со барање до градоначалникот на Центар, опремување на игралиштето. Жерновски веќе договори санација, рефлектор, нови кошеви и голови за фудбал.
По празниците Жерновски повторно ќе дојде во Крњево за да провери што е сработено.
