„И ние возрасните сакаме шарен а не безбоен свет“, оваа порака до децата и присутните ја упати градоначалникот на општина Центар, на отворањето на манифестацијата „Сакаме шарен, а не безбоен свет“.
Андреј Жерновски, кој е покровител на манифестацијата, посочи дека ако во петокот имаше настан на кој децата и учениците од општина Центар ги претставуваа традициите на европските земји и бевме под исто, европско небо, денеска под исто небо се сите единаесет култури на нашите народи и народности.
„Нашата општина секогаш ќе ги подржува и ќе учествува во организирање на вакви проекти. Само заедно и почитувајќи се, имаме иднина.
– Денеска се потсетуваме дека животот е премногу кус за да се живее тажно. Децата не разликуваат националност и вера, туку само добрина и пријателство“, рече Жерновски.
На манифестацијата децата ги претставија традицијата, културата, музиката на сите единаесет народи и народности: македонската, албанската, српската, црногорската, хрватската, турската, босанската, влашката, ромската, еврејската и ерменската.
Општина Центар трета година ја организира манифестацијата во соработка со Британскиот совет, Комисијата за еднакви можности, Секторот за образование, млади и спорт, а се реализира од седумте основни училишта во општина Центар.