Општина Центар, вљубениците во делата на македонскиот литературен великан Славко Јаневски, негови пријатели и почитувачи синоќа ја одбележаа првата година од отворањето на читалната која го носи името на поетот, писателот, сликарот, боемот и истражувачот Славко Јаневски.
Градоначалникот на општина Центар Андреј Жерновски посочи дека секој ден во оваа измината година читалната добила по 1 нов читател, кој во читалната влегол да размени некоја мисла или да прочита некоја добра книга.
„Името на Славко Јаневски не’ обврзува да работиме уште повеќе. Ќе отвораме нови читални, тие ја чуваат историјата, не’ спасуваат од минливоста и ни даваат богатство што им го оставаме на генерациите по нас“, рече Жерновски.
„Разни влади и власти имале различни гледања за великаните, но владите и властите се минливи, а великаните се вечни“, додаде градоналаникот Жерновски.
Никола Гелевски, чија издавачка куќа издаде 2 книги од Славко Јаневски: избор од поезија за возрасни и поезија за деца, рече дека Славко Јаневски е маркантна личност.
„Клучна порака кога живееме под варварска власт, кога владеат митови и измами е дека треба да се вратиме кон силните поединци, таков каков што беше Славко Јаневски. Македонската сцена е отруена, луѓето како Славко Јаневски, кои се идентитет на Македонија, треба да ги негуваме“, рече Гелевски.
Во емотивното обраќање, ќерката на Славко Јаневски, Јана, евоцирајќи спомени, рече дека во нивната куќа доаѓале и пријатели и непријатели, а татко и’ ги сакал сите, но особено децата.
„Татко ми како да имаше повеќе животи во еден живот. Беше писател, поет, сценарист за филмови, артист и сестран уметник.“, рече Јана.
Ќерката и сопругата донираа книги од Славко Јаневски и слика на која се рачно напишани негови стихови.