Градоначалникот на општина Центар, Андреј Жерновски со своите соработници беше на средба со жителите на населба Пролет.
Ги ислуша нивните проблеми и предлози кои треба да бидат вградени во буџетот на општината за 2015 година. Ова е најстара населба во Скопје, но жителите велат дека за првпат беше исчистена, уредена, зазеленета и доби нов лик.
Седум илјади квадратни метри исушени тревници и коров се отстранети, засадена е нова трева, отстранети се старите гранки кои беа потенцијљлна опасност.
Населбата Пролет сега ја красат 16 видови садници, главно повеќе зимзелени грмушки, 14 јавори и 2 магнолии или вкупно 779 нови садници.
Имплементирано е залагањето на општина Центар, полевањето да биде со техничка вода од бунар. Нови клупи и канти за ѓубре исто така се дел од новата урбана опрема.
Жителите се интересираа за судбината на нивните фасади, прашаа дали залудно земаа кредити за инвестирање во поправка за да можат да добијат енергетско ефикасни фасади.
Градоначалникот Жерновски им појасни дека овие две згради во населбата Пролет се влезени во програмата, но поради неодамна изгласаните измени во Законот за градење од страна на Собранието на РМ, ќе треба да се решат преку друга програма и со одобрение од страна на Советот на општина Центар.
“Има и волја и средства и оние згради за кои што се склучени договори ќе бидат завршени. Досега 7 згради добија енергетско ефикасни фасади, со задржување на постојниот изглед. Сметките за струја на граѓаните се пониски за 30 проценти“, рече Жерновски.
ДУП-овите ќе се менуваат во сите делови на општината и ги повика жителите да дојдат во општина и да ги изнесат своите барања. Со ДУП-от од претходната власт, предвидено е изградба на Театар на турската националност во близина на една од зградите во населбата Пролет.
Жерновски појасни дека се согласува дека некој од ДУП-овите се неумесно направени и мора да се направи ревизија, но она што е зацртано мора да се реализира.
Ќе се интервенира на укажување на граѓаните на уличното осветлување, ќе се бараат решенија за проблемите во паркирањето и проблемите со оџаците.