Општина Центар го исчисти и реконструираше зеленилото и направи нов парк меѓу зградите во Градски Ѕид, на булеварот „Кочо Рацин“, спроти Олимписки базен.
Жителите се задоволни бидејќи добија ново зеленило, дрвја и цвеќиња, по цели 40 години.
„Толку убави површини не сме имале. Ова е навистина прекрасно“, велат граѓаните.
„Местото го уреди општина Центар, но сега, заедно со граѓаните, истото треба и да се одржува. Новата зелена оаза е на површина од 4800 м2. Насадени се шест високородни листопадни садници, 1800 зимзелени листопадни грмушки и 3000 парчиња цветен расад, кој ќе се менува сезонски. Поставен е и целосно нов систем за полевање.
Засадени се жардинерите и меѓу зградите се поставени декоративни, заштитни зелени ѕидови. Ниското зеленило, кое е поставено на овој потег, има ист ефект за прочистување на воздухот како и високите дрвја.
Ова е парк за сите генерации. Наутро, за бабите и дедовците со внуците, а навечер е прекрасна атмосфера за прошетка и убаво поминато време на младите“, велат од Општина Центар.
Веќе наредната недела, општина Центар ќе ги санира и патеките.
