Амбасадорката на Република Србија во Р. Македонија, Н.Е. Душанка Дивјак-Томиќ изрази благодарност до општина Центар и до градоначалникот на општината, Андреј Жерновски за помошта која беше доделена за настраданите од катастрофалните поплави во Република Србија.
На средбата во кабинетот на градоначалникот, на Жерновски му ги пренела најновите информации за состојбите во нејзината земја.
Состојбата релативно се смирува, но опасноста не е помината.
Триесетина илјади граѓани се евакуирани, најголемата опасност демне во околината Шабац, Обреновац, електраната Никола Тесла кај Колубара и електраната Костолац.
Фактички – половина Србија е зафатена со штети од страшните поплави.
Како што изјави амбасадорката на Република Србија, Н.Е. Душанка Дивјак-Томиќ прва задача на државата е да се спасат сите човечки жители.
Според досегашните информации – досега има загинато 20 лица, некои со давење, некои од природна смрт.
„Сакам да се заблагодарам во името на граѓаните на Р. Србија за несебичната помош од Р. Македонија. Уверена сум дека ова е уште еден доказ за пријателството меѓу двете земји и уште еден кредит за натамошно развивање на пријателските добрососедски односи“, рече Дивјак-Томиќ.
Градоначалникот Андреј Жерновски потврди дека помошта од Република Македонија е несебична.
„Нашите граѓани знаат како е кога земјата ќе ја погоди природна катастрофа и знаат колку е значајна помошта од сите. Нашата соработка и помош продолжува. Општина Центар е секогаш отворена да даде помош на Република Србија и на сите земји и градови на кои им е потребна помош. Секогаш сме подготвени да помогнеме, како пријатели“, рече Жерновски.
Советот на општина Центар донесе едногласна одлука за доделување на еден милион денари за Република Србија, а поединци од општината несебично донираа храна, вода за пиење, ќебиња и хигиенски производи.