Денеска, градоначалникот на Град Скопје, Коце Трајановски во СРЦ Сарај, кај езерото Треска, се сретна со пензионерите од Ѓорче Петров и Сарај, во организација на Здружението на пензионери од Ѓорче Петров и Сарај.
-Градот Скопје во изминатите години има остварено одлична соработка со Сојузот на здруженијата на пензионерите на Град Скопје и тоа преку заемно учество во реализација на различни програми и активности кои имаат за цел остварување на поквалитетен живот на пензионерите. Нашата соработка ќе продолжи и натаму, затоа што сите ние им должиме многу на нашите пензионери- истакна градоначалникот Трајановски.
Градот Скопје со финансиски средства во износ од по 500 000,00 денари, три години по ред, а во 2014 година, финансиска поддршка во износ од 1 000 000,00 денари, континуирано вложува во реновирање на Рекреативниот центар Катланово и негово оспособување. Досега реновирано е фоајето на одморалиштето, комплетно се обновени ходниците на двата ката, а од средствата од 2012 година реновирани се бањите во собите на одморалиштето.
Во дворот на објектот поставени се клупи и осветлување, а следната година ќе бидат обновени и бетонските патеки околу Рекреативниот центар.
За пензионерите, Град Скопје, организира и групен превоз на дестинации на подрачјето на град Скопје и територијата на Република Македонија,во вкупен износ од 500 000,00 денари. Исто така, Градот организира и бесплатен превоз на возрасни лица, три дена во неделата – вторник, петок и сабота; од буџетот обезбедува и бесплатни слободни легитимации за јавниот градски превоз за пензионерите инвалиди.
Градот Скопје константно обезбедува поддршка во однос на организациско јакнење на Сојузот на пензионери на Град Скопје и здруженијата кои се негови членки, па оттука одвојува финансиски средства за поддршка на спортски манифестации како што е традиционалниот 13-то Ноемриски шаховски турнир, Градот Скопје ги покрива и трошоците во износ од 26 000, 00 денари за користење на Универзална сала за организирање на јубилејните десетти по ред Републички ревии на песни, музика и игри на Сојузот на здруженијата на пензионерите на Град Скопје што се одржаа во 2012 година.