„Новиот мини плоштад на спојот на улица „Пиринска“ со булеварот „Св. Климент Охридски“ е уште еден освоен простор за одмор и релаксација за жителите на околните згради и за минувачите.
На местото на несредениот паркинг, оштетен асфалт и подлога и бандери од кои висеа кабли, на површина од 290 м2, општина Центар изгради мини плоштад, хортикултурно уреден со јавно осветлување и нова урбана опрема.
Пјацетата е поплочена со комбинација од природен гранит и травертин. Материјалите се карактеризираат со трајност, квалитет и долговечност, лесно се одржуваат и се во склад со најмодерните светски стандарди за партерно уредување. Доминираат мултифункционалните урбани елементи, клупа и вградени држачи за велосипеди. Амбиентот го дополнуваат две високи дрвја – ликвидамбери, кои во лето ќе бидат природен чадор за сонце.
Во жардинери има густо зеленило, а просторот е осветлен со канделабра и 17 амбиентални светилки.
На барање на граѓаните, поставена е чешма со вода за пиење и разладување.
По средбите, кои градоначалникот Жерновски ги оствари со жителите на овој дел од Центар, кои се жалеа на изгледот и состојбата на просторот, општина Центар започна и го реализира ветувањето – запуштениот дел на спојот на улиците “Пиринска“ и “Св. Климент Охридски“ сега е убаво уреден и современ мини плоштад“, се вели во соопштението на Општина Центар.
