Македонската полиција на Охридскиот аеродром Свети Апостол Павле три дена се подготвуваше како да се справи со евентуален терористички напад на аеродром, грабнување на патници и нивно држење како заложници.
Во акцијата „Бран 2012“ учествуваа стотина припадници на специјалните полициски единици, хеликоптери, медицински екипи и противпожарни служби. Беше извршена симулација на тимска соработка помеѓу силите за безбедност,водење преговори со грабнувачите, решавање на заложничка криза во аеродромски простории.
Лицето кое пробало да внесе оружје на аеродромот е пресретнато од аеродормските служби, но тој го употребува оружјето и зема со себе заложници. Преговорите траеле речиси 24 часа. Биле исполнети некои од условите на киднаперите, но на крајот се одлучило да се оди со акција на нивно елимирање.
[nggallery id=54]
Во улога на грабнувачи и заложници беа студенти од Факултетот за драмски уметности во Скопје. Оваа акција се случува во време кога Европа па и регионот се соочуваат со закани од можни терористички напади, како што беше последниот на аеродромот во бугарскиот град Бургас. Настанот денеска беше отворен за јавноста, а присутни беа и преставници на повеќе странски амбасади во земјава.
Дел од другите државни институции не биле запознаени со сценариото на вежбата како што се медицинските екипи , а се со цел да се испита нивната брзина на делување во евентуални вакви ситуации. Командантот на акцијата Тони Јакимовски рече дека немаат информации дека аеродромите во Македонија се соочуваат со вакви закани
„За среќа немаме информации дека Македонија може да биде таргет на вакви терористи. Но она што се случува во нашето соседство ни укажува дека мораме да бидеме подготвени. Управата за безбедност и контраразузнавање ги врши сите подготовки за да не се случи такво нешто. Оваа вежба ни укажува и што доколку се случи,и мислам дека сме подготвени“ рече Јакимовски.