Еуфоричната атмосфера што деновиве владее во Штип поради одржувањето на манифестацијата „Штипска пастрамалијада“ и фестивалот „Макфест“ не ги спречи штипјани достојно да го одбележат големиот национален празник 11 Октомври.
Чествувањето на овој национален празник започна со свечен говор на претседателот на Здружението на борците од Штип и Карбинци, Трендафил Атанасов, пред Алејата на народните херои во центарот на градот, каде што цвеќе положија и делегациите на Општина Штип, армијата, полицијата, Здружението на борците, како и претставници на двете најголеми политички партии.
Прославата продолжи со пуштање во употреба на реконструираниот пат што води кон тврдината Исар, каде што е поставен Споменикот на револуцијата и свое обраќање имаше градоначалникот на Штип, Илчо Захариев, а заврши со Свечената седница на Здружението на борците од Штип и Карбинци, која се одржа во Големата сала на Општина Штип.
М.Р.