Со маици „Имаме план за живот во Центар“, вработените од улица го гледаат уривањето на кафе барот „Бастион“ кој се наоѓа на Ленинова (Аминта Трети).
Градежната механизација на општина Центар работи на отстранување на бетонската платформа.
Вчера беше поканет градоначалникот Саша Богдановиќ да дојде на утринска чајанка со сопствениците и медиумите, но тој не се појави.
На местото присутни се припадници на полицијата.
Општината вчера соопшти дека справувањето со диво поставената урбана опрема, односно терасите пред угостителските објекти, ќе продолжи и во наредниот период, со цел ослободување и нормализирање на сообраќајот на луѓе и на возила на целата територија на општината.
Од Општината велат дека по бројните жалби на жителите на Центар и по донесувањето на решенијата, на засегнатите страни им бил оставен простор од повеќе од шест месеци самите да постапат и да ги отстранат незаконски поставените објекти.
Бидејќи не го сториле тоа, Општината пристапила кон административно извршување на донесените управни акти.
Кристијан Ландов