Денеска, општина Центар го отвори паркот Капиштец. Тоа е парк за секого, за сите годишни времиња, парк со нова перспектива, велат од општина Центар.
„Ова е најубавиот парк, не само во Центар и во Скопје, туку и во цела Македонија. Во личната карта на паркот стои дека е на 20 000 м2, од кои 12 000 м2 се тревна површина, најголемиот природен зелен килим во Центар. Има две детски игралишта за деца од различни возрасти и кошаркарски игралишта за соодветна подлога за таков вид на спорт“, рече на отварањето на паркот градоначалникот на општина Центар, Андреј Жерновски.
Поставена е урбана опрема по која паркот ќе се препознава. Таа е сигурна и трајна, наведуваат од Центар.
Има два типа осветлување – амбиентално и високо осветлување, со канделабри. Поставен е автоматски систем за полевање, техничка вода се црпи од два ископани бунари.
По 40 години, кога за прв пат се уредува зеленилото, се заменија со нови патеките кои претходно беа тесни.
Паркот, кој повеќе години не беше професионално одржуван, сега е парк за сите вкусови, рече Жерновски.
Паркот Капиштец го красат 18 зимзелени дрвја, 6 листтопадни цветни дрвја, 6 високи грмушки, 582 цветни листопадни и зимзелени грмушки, кои цветаат во различни периоди од годината, 104 листопадни грмушки, 430 декоративни зимзелени грмушки, 184 покривачи, 4010 перени, 20 високи украсни треви, 870 мини-треви и 1450 луковици од лале, зумбул, нарцис и мускари.
Својата убавина паркот ќе ја покаже напролет, најавуваат од Центар.
Поради заштита од несовесните граѓани, општина Центар од понеделник најави дека ќе постави чуварска служба.
Отворени сме, рече градоначалникот Жерновски, за критики и предлози, за Капиштец да биде наш парк.
Со чашка кафе и топол чај жителите даваа свое видување за уште поубав парк Капиштец.
