Во недостиг на средства во општинската каса, штипската локална власт реши на граѓаните да им наплаќа за остварените дела. За рекреирање во новоизградените спортски комплекси низ градот, поточно за оној во населбата „Автокоманда“, граѓаните мораат да платат 50 денари од час, во спротивно би можеле само да одморат на клупите што се поставени околу терените.
Но, она што најмногу ги изреволтира штипјани е одлуката за наплата за користење на спортско-рекреативниот комплекс „Џексон“.
Пред неполна година Советот на општина Штип донесе одлука за дислокација токму на овој објект, а ја базираше на фактот дека овој спортски терен е нефункционален.
Врз база на оваа одлука вработените во јавното претпријатие „Исар“ на 19 ноември започнаа со преселувањето на опремата од спортско-рекреативниот центар, а десетина дена подоцна започна рушењето на административната зграда на овој објект во кој беа сместени и соблекувалните. Од теренот остана само студен асфалт и прав.
Но, новиот градски татко се покажа како „пишман-аџија“, па реши да ја стопира одлуката. Постави нов раководител, кој во иднина ќе треба да „стопанисува“ со оваа локација.
„ Џексон’ беше почетно реновиран, а сега продолжуваме со неговото уредување на задоволство на сите љубители на спортот. Термините веќе се издаваат, а сите што се заинтересирани треба да се јават во Општина Штип“, изјави Миле Јакимовски, раководител на СРЦ „Џексон“.
Она што можеа да го воочат штипјани е дека состојбата со теренот не е воопшто променета, освен што трибините се пребојадисани.
За она што до пред неколку месеци локалните власти сметаа дека е руина, граѓаните сега треба да издвојат по педесет денари од лице за да го изнајмат. Изградбата на нови соблекувални, барем засега, изгледа како илузија.
