Проектот за реконструкција на старите фасадите на зградите во централното градско подрачје во Штип, поточно во делот околу плоштад „Слобода“, кој започна пред месец и половина, речиси е при крај.
Идејата за реконструкција на дотрајаните фасади во централното градско подрачје беше поттикната уште во 2011 година од страна на тогашниот градоначалник, Зоранчо Алексов, а предвидуваше обезбедување бесплатен простор за рекламирање за оние фирми што ќе се вклучат во реализацијата на оваа идеја.
За жал, ваквата идеја се сведе само на обнова на фасадата на зградата спроти „Стопанска банка“, за која средствата беа обезбедени од страна на фирмата „Телекабел инженеринг“.
Пред стартот на реализацијата на овој проект, актуелниот градоначалник, Илчо Захариев, информираше дека за обнова на фасадите се обезбедени 10.000 евра, од кои дел се донации до штипски бизнисмени, а дел се издвоени од буџетот на Општина Штип.
Но, очигледно е дека за актуелното раководство на Општина Штип обновата и реконструкцијата се состои во покривање на фасадите со свежа боја, без притоа да се санираат оштетувањата на фасадите и натстрешниците, кои можат да ја доведат во прашање и безбедноста на граѓаните.
Штипјани сè почесто го поставуваат прашањето колку реално ја чинеше Општината создавањето претстава во јавноста дека во градот сè се обновува и се гради.
