Директорот на Агенцијата за енергетика, Лазар Гечевски денеска на градоначалникот на Куманово, Зоран Дамјановски му врачи согласност-мислење за програмата за енергетска ефиканост. За да се реализира програмата треба да ја усвои и Советот на Општина Куманово.
-Се соочуваме со период кога енергијата е дефицитарна во светот, а пред се во Република Македонија. Со оваа стратегија се подразбира улично осветлување, испразнување на енергијата преку енергетски фасади, прозорци и се она е енергетската ефикасност и заштита на енергија-изјави градоначалникот Дамјановски.
Оваа стратегија се одвива во рамки на Законот за енергетика од 2011 година, а со неа сите општини се обврзани да оформат програма за енергетска ефиканост. Откако истата ќе ја усвои и Советот на Општината, предвидено е да се спроведе едногодишен план, кој повторно ќе го разгледа Агенцијата за енергетика.
Инаку Куманово е единствен град во државата, кој го користи гасот како најефикасен, најеколошки и најекономски исплатлив енергенс. Освен дистрибутивна мрежа за јавни уставнови, општината работи и на гасификација на колективни објекти.
Елена Георгиевска