Општина Центар, од утре ќе започне со акција за расчистување на дивиот пазар на стари работи кој се наоѓа под Скопското Кале.
Овој див пазар е во непосредна близина на Царина на Република Македонија и базенот Плаја Виста.
Пет години никој не се погрижил да се расчисти сметот, кој е жариште и непосредна опасност за секакви заразни болести. Тука се расфрлени стари точаци, јамболии, канти, кеси, обувки, распадната облека, пластика.
На ужасната миризба и отпадот кој се наоѓа и до самата капија на Управната зграда на Царина, веќе подолго време се жалат и вработените, но и сите кои минуваат тука.
Акцијата општина Центар ќе ја реализира со една градежна машина-утоварувач, 10-тонски камион и еден помал камион , а 50-тина работници ќе го чистат сметот и ќе го уредуваат теренот.
Собраниот смет ќе се носи на депонијата Дрисла.
Општина Центар ги информира сите граѓани дека овој простор ќе биде затворен за секакви активности и движење.
Овие фотографии се снимени пред самиот почеток на акцијата.