Средношколците од СОУ „Св. Климент Охридски“ од Охрид денеска не ја следеа наставата и протестираа пред охридската гимназија. Тие се спротивставуваат на новиот концепт за полагање државна матура и бараат да се врати стариот начин.
Новиот концепт на полагање на државната матура негативно се одразува и врз сегашните матуранти и врз идните, и не придонесува за повисок квалитет и повисоки знаења. Тука е вклучено електронското полагање и полагањето во седум дена кое за нас е многу напорно, несигурно и неприфатливо – истакна Емилија Костоска, ученичка во ова училиште.
Охридските средношколци беа одлучни дека нема да се вратат на настава се додека не се сослушаат барањата на Средношколскиот Пленум и дека ќе им се придружат на своите врсници низ целата држава.
Бојкотот на наставата средношколците уредно го пријавиле до директорот на училиштето. Преку писмото испратено до директорот, охридските средношколци ги доставиле и барањата за начинот за полагање на државна матура кои се идентични со Средношколскиот Пленум во Република Македонија.