Ноќеска градот беше преплавен со плакати и пораки од студентите до граѓаните, ВМРО-ДПМНЕ и СДСМ. За партиите јасна порака дека не сакаат партиски да ги поистоветуваат. Но во исто време пораката до сите студенти и ученици, професори и родители и сите граѓани е да се придружат на студентскиот марш во среда во 12 часот.
Студентите кои се противат на државниот испит и реформите на владата синоќа поставија пораки пред штабовите на ВМРО-ДПМНЕ во Битола и пред штабот на СДСМ.
На ВМРО-ДПМНЕ му порачаа Есктерно за Владата.
На СДСМ му порачаа – Не сме ваши полтрони!
Постојат луѓе кои се борат и работат и оние кои ја собираат славата за направеното“ (Ганди)
Би сакале уште еднаш да потенцираме дека нема да дозволиме да бидеме прибрани под ниту едно партиско милје. Нашите барања ја надминуваат партијата, тие се нешто повеќе. Како значаен општествен сегмент, како студенти (академски граѓани), сакаме да ја потенцираме нашата интелектуална независност, нашата слободна и критичка мисла која не е диригирана од ниту една популистичка агенда, туку е последица на разумноста и обмисленоста. Нашиот органон се аргументите, кои не се насочуваат против партиите туку против неправдата. Затоа ве замолуваме да ја почитувате нашата решителност, пишува во материјалот кој синоќа е оставен од студентите низ Скопје.