Граѓаните денеска протеститраа пред Собранието на Република Македонија, за време нас закажаната пленарна седница на чијшто дневен ред е предлог законот за прекинување на бременоста.
Според нив, дополнителните амандмани кои беа донесени во меѓувреме сеуште го ограничуваат правото на слободниот избор на жената, а граѓаните со протестот се залагаат за нов закон кој ќе ги почитува човековите права.
„Остануваат доставувањето на писмено барање од страна на жената, задожителното советување во кое се вклучени и предностите од продолжувањето на бременоста, остануваат трите дена на чекање по задолжителното советување, писмената согласност“, потенцираше Бојан Јовановски од ХЕРА, објаснувајќи дека актите на советувањето се она што најмногу ги интересира, и што покажува дека самиот закон не е сеопфатен односно не е интегрален.
Со ова, изјави Јовановски, Министерството за здравство не ги сослуша препораките на граѓаните, 72 НВО, стручните здруженија на гинеколози и меѓународниот фактор, кои порачаа повлекување на овој закон од итна постапка и спроведување на истиот по редовна, но со широк консултативен процес.
Граѓаните им порачаа на Министерот и Собранието да не се ценкаат со женските права, и апелираа до сите пратеници да не го гласаат предлог законот.
„Апелирам до пратеничките од сите политички партии, и се надевам дека нема да ги прецениме“, изјави Неда Коруновска од Реактор, додавајќи дека овој предлог закон е тест за да се види дали квотите го дале очекуваниот резултат.
„Пратеничките со трет мандат седат таму поради квоти, и доколку изгласаат ваков закон ќе ги држиме за одговорност и ќе бараме укинување на квотите во Република Македонија“, порача Коруновска.
Оваа иницијатива нема да застане тука, а една од наредните мерки е барање до претседателот на Македонија да не го потпише законот, порача Јовановски.
„Понатаму ќе гледаме да го спориме овој закон и на Уставен суд“, изјави тој.
Марија Савовска од Акција Здруженска, рече дека ова е последен обид да се спречи силеџиството кое се демонстрира во целата постапка околу донесувањето на законот.
Се надеваме дека овој Парламент ќе не заштити од „заштитата“ која ни ја демонстрираат Министерот за здравство и оваа Влада“, порача таа.
Темјана Поповска