Oбилните врнежи дожд кои вчера ја зафатија Република Македонија, предизвикаа зголемување на водостојот на реката Лепенец, а со тоа се зголеми и нивото на реката Вардар. Водостојот на Вардар во Скопје после обилните врнежи е зголемен и нивото на водата е до горната кота од речното корито.
Поради тоа, синоќа екипи на Штабот за заштита и спасување на Град Скопје интервенираа на најниските точки на реката Вардар во општина Аеродром (до објектот на ПИОМ), со цел при поголем водостој да се спречи евентуално уништување на велосипедската патека на тој дел од Кејот на реката Вардар, соопшти Град Скопје.
Оттаму посочуваат дека на терен интервенирале екипи на Штабот за заштита и спасување на Град Скопје кои долж Кејот на реката Вардар поставиле вреќи со песок.
Штабот за заштита и спасување на Град Скопје ја следи состојбата на терен и доколку има потреба дополнително ќе интервенира.