Зошто не смогнаа сили и да го слушнат нашето „не“ за барокна катна гаража кај Автомакедонија? Вака прашуваа жителите на околните згради. Премиерот Никола Груевски, министерот Миле Јанакиески и градоначалникот на Скопје, Коце Трајановски, иако уредно поканети, не дојдоа на закажаната средба.
Од повиканите дојде градоначалникот на општина Центар, Андреј Жерновски.
Тој потсети дека цели две години, заедно со граѓаните ја бијат битката да не се гради барокна катна гаража на тој простор, бидејќи тоа ќе им ја упропасти живеачката, а и на стотина метри има гаража која е неискористена.
„ 21 инспекција дојде во општината само за овој случај, и се со цел да не притискаат да издадеме решение за почеток на градба на гаражата. Гласот и вољата на граѓанинот мора да се слуша. Овој собир и вашето присуство ќе ги замисли и ќе ги спречи да одат до крај. Ќе опстоиме“, им вети Жерновски.
Кочо Стојчески, раководител на инспекција во општина Центар појасни дека инвеститорот Никофон нема правосилно решение за градење, бидејќи градоначалникот Жерновски, на барање на жителите донел решение за повторување на постапката.
„Се бориме за нешто што е праведно.Се бориме како Давид и Голијат, зошто државата се бори со сета сила да ги завршиме решенијата за отпочнување на градбата. Груевски и Јанакиески немаат образ да дојдат и да ве погледнат во очи“, рече Стојчески.
Граѓаните поднесоа кривични пријави за злоупотреба на службена должност против правобранителот, поранешниот градоначалник Тодоровиќ и против Миле Јанакиески.
Предложија и да соберат 120.000 евра за да го исплатат инвеститорот, кој за таа сума го купил, како што рекоа местото кое злато вреди.