Две залепени школки, а на делот кон Градскиот парк која е доминантна визура е ѕид од стакло. Вака изгледа првонаградениот труд на конкурсот за идејно решение за ресторан „Езерце“, кој го распиша општина Центар.
Трудот е со шифра „Мезе“, а автори се Филип Конески, Борко Георгиев и Иво Ѓорѓиев. Објектот треба да биде потонат во земја за да дојде до нивото на езерцето. Жири комисијата составена од вработени од општината и надворешни експерти констатира дека идејното решение ги почитува постоечките структури како што се дел од железничката станица и познатото возче Ќиро и дел од некогашниот летен шанк.
На овој конкурс беа пријавени 25 труда, 3 повеќе од минатиот конкурс за училиштето во Капиштец. „ Ова е ренесанса на нашата фела. Години наназад имаше многу конкурси, но буквално се јавуваа еден или двајца за да се задржи формата “ велат архитекти од општина Центар.
Последен таков конкурс беше плоштадот во мал ринг познат како плоштад на ВМРО. Сега работата е во рацете на комисијата за јавни набавки од општина Центар која треба да изработи тендерска документација за склучување договор за основен проект со првонаградениот. Општина Центар подготвува изложба на која можат да земат учество сите пријавени на конкурсот.
