Со симболично уривање на споменикот на медиумскиот диктатор кој, во моментов, управува со телевизијата и со македонската химна, членовите на „АЈДЕ“ – платформа за граѓанска политика го почнаа својот перформанс пред Македонската телевизија, мотивирани од потребата да и’ порачаат на МРТ дека треба да биде сервис на народот, а не мегафон на Владата. Тие носеа розеви очила и кога се урна споменикот – тие ги извадија очилата, покажувајќи дека јавниот сервис конечно треба да почне да информира за она што навистина се случува во државата.
Откако симболичниот медиумски диктатор падна, новинарите и граѓанските активисти: Зоран Бојаровски, Сашка Цветковска, Кристина Леловац, Инес Ефремова, Јана Коцевска и Билјана Бејкова, говореа за слободата на изразување, за слободата на медиумите, за пропагандата и за улогата на МРТ како јавен радиодифузен сервис на граѓаните.
Протесниот перформанс траеше околу еден час, а за цело време, зградата на МРТ, од активистите, ја чуваа голем број полицајци.
