Комисијата за утврдување штети при елементарни непогоди ќе ја процени штетата на становите во зградата на улицата „Бидимаш“ во Прилеп по пожарот што настана при експлозијата на плинска боца во саботата вечерта, ги информираше денеска прилепскиот градоначалник Марјан Ристески станарите од опожарената зграда.
Ристески, кој денеска ги посети станарите на шестте оштетени станови, посочи дека Комисијата за утврдување штети при елементарни непогоди при Советот на општината, ќе излезе на терен и ќе ја процени штетата во становите за да се најде начин за финансиска помош.
Во саботата околу 19,30 часот експлодираше плинска боца која станарот, исплашен, ја изнесол во ходникот на зградата. Беа повредени седум лица, од кои еден пожарникар и по санирањето на нивните повреди во градската болница „Борка Талески“ беа пуштени на домашно лекување. Од противпожарната единица информираа дека процените укажуваат дека три од шесте стана беа повеќе зафатени со пожарот, а првично, вкупната штета во сите станови е околу 300 илјади денари.
Златко Ристески, директор на ЈП „Комуналец“ најави дека нивните екипи ќе го расчистат изгорениот материјал и ќе помогнат во бојадисување и средување на ходниците во зградата.