Прогресот постигнат во петте приоритетни области наведени во декемврискиот извештај од Европскиот совет, кои се дел од пристапниот дијалог на високо ниво ќе бидат главна тема на средбите со еврокомесарот за проширување Штефан Филе кој во вторник доаѓа во посета на Република Македонија за финализирање на пролетниот извештај за земјата.
Како што изјави вицепремиерот за европски прашања Фатмир Бесими на денешната средба со новинарите, Филе, кој ќе биде придружува од директорот на Директоратот за проширување при ЕК Стефано Санино, со македонските владини претставници ќе разговара и за политичкиот дијалог, при што очекува да се нотира надминувањето на политичките недоразбирања меѓу власта и опозицијата што следеше по настаните во Собранието од 24 декември, како и формирањето на Експертската комисија која треба да помогне тие да се расветлат.
Тема на разговор ќе бидат и локалните избори, за кои Бесими вели дека не се услов Македонија да добие позитивен извештај од ЕК, но може да го загрози тој процес доколку земјата не покаже капацитет да спроведе мирни, демократски и фер избори, затоа што се дел од политичките критериуми кои мора да ги исполни секоја земја кандидат за членство во Унијата.
Тој очекува ЕК да подготви кредибилен и објективен извештај за процесот на реформите во областа на судството, владеење на правото, за реформите во јавната администрација, слободата на медиумите, спроведувањето на Охридскиот договор и функционална пазарна економија. Акцент очекува да се стави на исполнувањето на политичките критериуми, со оглед дека политичката ситуација и изборите се следат, како што вели, под лупа од земјите членки на Унијата, а за што многу е важно земјата да добие позитивна оценка.
МНР треба да подготви извештај во однос на делот на обврските за прогресот во добрососедските односи и разговорите за името.
– Тука очекуваме да се нотираат бројните иницијативи и средби што ги имаше Владата на различно ниво – од премиерско до државни институции и одредени агенции и директорати и со Бугарија и со Грција, што ќе покаже колку сме активни во тој дел, рече Бесими.
Во однос на слободата на медиумите, најави дека веќе следната недела од страна на Министерството за информатичко општество и администрација кое ја презеде надлежноста за новиот закон за медиуми, ќе биде организирана јавна дебата на која ќе бидат поканети да учествуваат сите заинтересирани страни, вклучувајќи го и ЗНМ. Владиниот пристап, пак, вели ќе биде отворен и искрен за разговорите на оваа тема.
Според него, Македонија ќе има време да испорача резултати и по 16 април кога треба да биде презентиран пролетниот извештај за земјата, а од значење е, подвлече, што има динамизирање на процесот на проширување од страна на ЕК во однос на регионот.
– И по 16 април до јуни ние имаме можност да покажеме напредок. ХЛАД е механизам што дава динамика на процесот кој е многу важен и исклучително комплексен и до јуни, а и после јуни ние треба да продолжиме со реформите. Дотогаш потребно е посветена работа од сите инстуции кои се вклучени во тој процес. Оценката која ќе ја содржи извештајот нема да биде за Владата туку за Македонија, посочи Бесими кој раководи со Секретаријатот за европски прашања, како координативно тело на процесот за евроинтеграции на земјата.