Фолклорниот ансамбл „Љупчо Сантов“ и месната заедница од населбата Оризари, Кочанско се организатори на етно-фестивалот „Ѓурѓовденски обичаи“ што годинава се одржува по петти пат.
Фестивалските содржини започнаа синоќа во соседната општина Зрновци со дефиле и концерт на фолклорни ансамбли од Делчево, Радовиш, Кочани, Оризари и Босилеград – Република Србија.
Во текот на денешниот ден се одржуваат натпреварите во влечење јаже, скокање во вреќа, носење јајце во лажичка, а ќе бидат претставени и традиционалните ѓурѓовденски обичаи биење млеко, подготвување масло и сукање зелник проследени со песни и ора.
– Наша цел е да го зачуваме и претставиме материјалното и духовното богатство поврзано со празникот Ѓурѓовден, со што го славиме будењето на пролетта и животот воопшто. Со тоа ја продолжуваме традицијата според која овој ден во нашиот крај го означувал периодот на интензивни активности во земјоделието и сточарството, истакна м-р Александар Тошев, претседател на Советот на фестивалот „Ѓурѓовденски обичаи“.
Фестивалот ќе заврши вечерва со фолколорен концерт во Оризари на кој ќе настапат фолклорни групи и ансамбли од Македонија, Бугарија и Србија.
Манифестацијата е финансирана од Министерството за куктура на Република Македонија, од Општина Кочани, како и од локалниот бизнис сектор.