Во пресрет на големиот национален празник 11-ти oктомври, Форумот за демократска Македонија организираше во Вашингтон вечер посветена на македонското културно наследство. Домаќин на оваа прослава беше Амбасадата на Република Македонија во САД.
Во центарот на настанот беше предавањето за слоевитото уметничко и архитектонско наследство на Република Македонија од историчарката на уметност и член на Форумот за демократска Македонија, д-р Анета Георгиевска-Шајн. Во своето едночасовно излагање, таа се осврна на различните култури кои оставиле траги на територијата на Република Македонија, почнувајќи од античкиот период, преку Византија и Отоманската империја, па се до најновата историја.
На предавањето присуствуваа бројни американски граѓани со личен или професионален интерес за балканските земји.
Меѓу присутните беа и новинари, дипломати од Стејт департментот и претставници на повеќе невладини организации, како Националниот демократски институт и Меѓународниот републикански институт. По предавањето и дискусијата, за гостите беше организиран прием со традиционална македонска закуска и вино.
Предавањето за македонското културното наследство беше поддржанo со грант од Министерството за надворешни работи за организации во дијаспората.