Тројца малолетници од Тетово ќе одговараат за намерно палење контејнери во текот на минатиот месец во градот, информираат од полицијата. Против тројцата млади потпалувачи се поднесени кривични пријави три различни дела, информираат од СВР Тетово.
„Секторот за внатрешни работи Тетово ja расчисти серијата пожари на контејнери кои се случија минатиот месец во Тетово и изготви соодветен поднесок (известување) до Основното јавно обвинителство Тетово против тројца малолетници на возраст од 15 и 16 години од Тетово, а поради сомнение дека сториле три кривични дела: „предизвикување општа опасност“, „непостапување според здравствени прописи за време на епидемија“ и „загадување на животната средина и природа“, казниви по членовите 288, 206 и 218 од Кривичниот законик“ информира портпаролот Марјан Јосифоски.
Според полицијата, тројцата тетовски тинејџери, на 18 и 28 април годинава, додека беше во сила полицискиот час, навечер ги палеле контејнерите на неколку локации на улиците „Благоја Тоска“, „107“ и „Илинденска“ во градот, прекршувајќи ја притоа и забраната за движење.