Деветнасет годишен велешанец и еден малолетник од Прилеп се осомничени за крадење бакарен лим од црквата „Св. Архангел Михаил“ во гостиварското село Тумчевиште.
СВР Тетово соопшти дека Ш.З. (19) и малолетникот биле приведени, непосредно по кражбата. Двајцата крадци биле забележани како заминуваат со „застава 101“ со приколка, од жител на селото кој се наоѓал близу до црквата. Случајот го пријавил во полициското одделение Чегране, чии службеници набрзо го нашле посоченото возило. Во автомобилот имало 11 парчиња бакарен лим, бакарна жица и лимарски клешти.
По расветлување на кражбата, СВР Тетово најавува соодветни пријави.
Црквата „Св. Архангел Михаил“ изминатава година два пати беше провалувана и сквернавена, а сторителите не беа откриени.
