Советот на СОНК на седницата на 14. септември ќе гласа за одлуката за Генерален штрајк, кој според претходните најави би се одржал на 29 септември.
Советот се очекува да усвои и жалба до Меѓународната организација на трудот против измените и дополнувањата на законите за основно и за средно образование, во делот на штрајкот, со кој во случај на штрајк, наставниците што штрајкуваат ќе се заменат со резервни.
„Според првите реакции од официјални лица од МОТ, тие се фрапирани од овој случај, кој и според нив е единствен во сите држави од Европа и сосема е очекувано дека, за жал , Република Македонија ќе сноси подолгорочни негативни последици поради кршење на меѓународни конвенции, чие почитување е задолжителна меѓународна обврска.
На седницата на Советот на СОНК поканети се и ресорните министри, а поканата важи и за прес-конференцијата, по завршување на седницата.
Сите информации, што пристигнуваат во Советот на СОНК, јасно укажуваат дека најголемиот дел од членството, над 30 илјади доброволно зачленети во нашиот Синдикат, цврсто се решени да истраат до крај во легитимната борба за заштита на своите права и целосно ги поддржуваат сите активности на Советот на СОНК и на раководството на СОНК,во одбрана на интересите на нашиот Синдикат“, пишува во соопштението на СОНК.