Советот за општи работи на Европската унија (ГАК) и дефинитивно одлучи жешкото прашање за проширувањето и можното доделување датум за почеток на пристапните преговори со кандидатите Македонија и Србија да го отвори на последниот состанок на министрите за надворешни работи на земјите-членки на Унијата што ќе се одржи во јуни, неколку дена пред Самитот на Европскиот совет кој е закажан за 27-ми, идниот месец.
Шефот на дипломатијата на Ирска и претседавач со ГАК-от, Емон Гилмор, по денешниот состанок соопшти дека тој и неговите колеги “подоцна ќе му се посветат на прашањето за проширувањето“.
Министрите за надворешни работи денеска во Брисел го подготвуваа утрешниот Самит на Европскиот совет, кој ќе биде посветен на засилување на даночната контрола во ЕУ и на енергетиката, додека прашањето за проширување, иако беше на агендата, според Гилмор е одложено за 25 јуни, кога Советот за општи работи на Унијата ќе го одржи последниот состанок во подготовката на јунскиот Самит на ЕС.
– Денеска само ги допревме прашањата кои ќе бидат опфатени со јунскиот Самит, како економските политики, имплементацијата на раст и работни веста, како и прашањето за проширување. Но, на нив ќе се навратиме подоцна, напомена ирскиот вицепремиер Гилмор на прес-конференцијата по завршувањето на ГАК-от.
Сепак, на денешната дискусија на состанокот, токму Гилмор побара флексибилност од земјите-членки во однос на прашањето за проширувањето. Со ова, иако во агендата на денешниот состанок на министрите беше и точката за “можен повик на Советот да донесе одлука да ги отвори пристапните преговори со земјите-кандидати“, јасно е дека 27-те шефови на дипломатиите ќе се зафатат со ова веќе горливо прашање на два дена пред клучниот Самит, на кој Македонија и Србија како единствени кандидати очекуваат да добијат датум за почеток на пристапните преговори.
