Две дојави за пожар имало по 17 часот во Скопје. Едната била за трафостаницата во Пинтија, каде се утврдило дека не гори таа, туку во нејзина непосредна близина, а другата дојава е за во Бунарџик каде имало експлозија.
Во Пинтија било интервенирано со две возила, па биле повикани и други екипи од Автокоманда, а горела сува трева која се запалила од искри на далноводот.
„Поради сериозноста на објектот, беше испратена дополнителна помош. На лице место видовме дека не е пожарот во трафостаницата, туку близу далноводот. Беше запалена сува трева. Пристапено е за гаснење. Заради пуштање на далноводот, останаа екипите. Поради неколку кратки прекини, претпоставуваме дека причина за пожарот се испадите во претходниот час. Имавме дојава за експлозија на далновод и во индустриската зона Бунарџик“, кажаа од скопската пожарна.
-Испад на далекуводот од ТС Скопје 4 кон ТС Бунарџик и пожар во близина на трансформаторската станица, беше причина за прекин на снабдувањето со електрична енергија во поголем дел од Скопје, делови од Велес и Овче Поле. Овие два фактори го условија испаѓањето од погон на двата 400/110 кV трансформатори, а со тоа и испадот на целата трафостаница Скопје 4 во населбата Пинтија, се вели во официјалното соопшение од МЕПСО.
Трафостаницата во Пинтија се исклучила поради активирање на заштитата. Бидејќи трафостаниците во Бунарџик и Пинтија се меѓусебно поврзани, постои можност, испадите од мрежата да се предизвикани од едната, па проширени и на другата.
Од Мепсо информираат дека се можни привремени во снабдувањето со струја затоа што екипите на компанијата ќе ги отстрануваат преостанатите дефекти.