По повод денот на планетата земја, во Штип се спроведе акцијата „Еко пролет“, која ќе продолжи и во наредниот период. Веќе се спроведени десетина акции за чистење на сметот во штипските населби.
Заради подигање на еколошката свест , инспекторатот за животна средина при Општина Штип, заедно со вработените од одделението за урбанизам, определија локалитети што им се доделија на основните училишта, а во иднина преку ангажман на вработените и учениците ќе требат да бидат претворени во еколошки зони.
Учениците и вработените во основните училишта денес ги презедоа првите активности за разубавување на овие локалитети, а во работата им се придружија и дел од вработените во Општина Штип, како и градоначалникот Илчо Захариев.
Од локалната самоуправа најавуваат заострување на контролата од страна на комуналните и на еколошките патроли, како и високи казни за оние што ќе фрлаат смет и ќе ја уништуваат животната средина.
