На дваесетина локации во урбаниот дел на Крива Паланка и приградскиот реон, кејот на Крива Река, патеките кои водат до манастирот Св .Јоаким Осоговски и пешачката патека до Гимназијата, денеска се одржа масовната еколошка акција „Почиста животна средина за подобра иднина“.
Акцијата ја реализира Општината, како дел од програмските активности за чиста и здрава животна средина
– Задоволен сум од вклученоста на сите чинители во акцијата која е продолжение на активностите кои периодов се реализираат, подигнување јавни зелени површини на повеќе локации, расчистување на диви депонии, поставување нови корпи за отпадоци, нови садови за смет, во насока на унапредување на животната средина, одржување чиста и здрава околина, како и подигнување на свеста кај заедницата, пред се кај младите за значењето на чиста околина во севкупното живеење, изјави градоначалникот на Крива Паланка Борјанчо Мицевски.
Покрај вработените во општинската администрација и учениците од основните и средното општинско училиште од градот, во акцијата се вклучија и граѓански здруженија, заедници на станари и други субјекти и лица.
Паралелно, акцијата ја реализираа и вработени од јавно претпријатие „Комуналец“ кои со механизација расчистија околу четириесет локации: депонијата на излез од населба Лозаново кон село Градец, депонијата на улица „Осоговска“, во Дренчка мала и кај Ловечки дом, депонијата кај село Варовиште, регулациското корито на долот во населба „Единство“ и други помали локации.