Втора година по ред, Европската комисија ја споменува општина Центар во Годишниот извештај за напредокот на Република Македонија. Ова покажува дека и по минатогодишната забелешка за притисокот врз општината од страна на централната власт, ништо не е променето.
„Некои општини како Центар, беа предмет на непропорционален број на инспекции од државниот инспекторат. Имаше недоследни истраги од страна на власта за нападите и вандализмот врз зградата на општина Центар. Потребни се поголеми напори за да се обезбеди транспарентност во доделувањето на големите грантови на општините и да се осигура дека тие ги имаат потребните финансии за да ги спроведат обврските што им се доделени“, стои во Извештајот на Европската комисија.
Потсетуваме дека општина Центар, како што кажуваат и самите инспектори, има посебен третман, за разлика од другите општини.
Се уште не се познати виновниците за демолирањето на општината и за доведување во опасност на животите на претставниците на медиумите, градоначалникот, советниците, вработените во општинската администрација и претставници на дипломатскиот кор кој дојдоа да видат што се случува во општината.
Не е официјално кажано кој стои зад протестот, затоа што таканаречената невладина организација „Веритас“ вооошто не е регистрирана. И покрај тоа што вандализмот беше регистриран од камерите и фото апаратите, МВР и по година и пол не може да ги идентификува насилниците.