Медицинските сестри од кумановската општа болница се обучуваа на тема „Со вистинско лидерство и темелен менаџмент до максимално успешна болница“.
Преку практични примери кои беа презентирани на денешната обука, одговорните медицински сестри, учеа како да ги надоградат своите вештини и да ја подобрат комуникацијата и ефикасното делување кон пациентите.
Предавањето го одржа истакнатиот обучувач, универзитетскиот професор Лазар Ѓуров, кој смета дека во услои и период кога здравството се соочува со реални проблеми поради недостиг на ресурси, раководството на болницата покажува интерес за едукација на кадарот. Дополнителната едукација е значајна и покрај претходната што ја имале медицинските сестри во делот на управувањето и лидерството.
– Во болницата работат луѓе кои се стручни, во нивната едукација имале одерена едукација во делот на менаџментот или лидерство, но ова е дополнителна доедукација за да можат поуспешно да ги извршуваат своите должности. Навистина е прекрасно што раководството е отворено за таква едукција и денеска преку обработката на темите ќе им дадеме сознанија, насоки како тоа да го имплементираат во секојдневното функционирање за да може пациентите да бидат позадоволни и болницата да функционира успешно, изјави Ѓуров.
Валентина Стојмировиќ, главна сестра во општата болница Куманово смета дека со ваквите обуки сестрите ќе ја подобрат комуникацијата не само со пациентите, туку и меѓусебно и со остантиот персонал во болницата.
– Вакви обуки ќе организираме почесто, едукацијата н неопходна за успешни резултати на болницата, изјави Стојмировиќ.
Надлежните од болницата најавија дека и во иднина ќе организираат едукација на различни теми за медицинските сетстри во болница.
Кумановската болница ја покрива територијата на североисточниот регион и нуди услуги за приближно 150.000 жители од општините од североистокот.