До изборот на нов претседател на Самостојниот синдикат на новинари и медиумски работници (ССНМ), новинарот Ѕвездан Георгиевски ќе биде в.д. претседател, беше соопштено на денешното изборно собрание на синдикатот, на кое беше избрано ново раководство.
Тамара Чаусидис, која беше претседател изминатите осум години, рече дека изборот на в.д. претседател се случил бидејќи немало кандидат од членовите на ССНМ за претседател, а раководењето го презема Извршниот одбор.
В.д. претседателот Георгиевски потенцираше дека Самостојниот синдикат на новинарите и медиумските работници е важна алка не само во остварувањето на новинарските права што произлегуваат од работниот однос и во зголемувањето на социјалниот статус на новинарите, туку и во остварувањето на новинарскиот идеал – слобода на говорот.
На Собранието беа избрани и назначени новите членови на Извршниот одбор, Надзорниот одбор и членови на Статутарна комисија.