Претседателот на македонското Собрание, Талат Џафери за грчкиот весник „Нафтемборики“, изразува убеденост дека Договорот од Преспа ќе помине во грчкиот Парламент, иако вели дека не сака да ги коментира внатрешно-политичките случувања во Грција и додава дека договорот е корисен за граѓаните и од двете земји, јави дописничката на МИА од Атина.
-Независно од реакциите на опозицијата и во двете земји, Договорот од Преспа е добар, придонесува за стабилноста во внатрешноста на Грција и на Македонија, но и во стабилноста на поширокиот регион, вели Џафери.
Спикерот на Собранието вели дека и покрај одбивањето на Претседателот Иванов да ги потпише уставните измени, тие стапуваат на сила.
-Претседателот на Република Македонија е обврзан да потпише врз основа на собраниското мнозинство, а неговото одбивање е целосно противуставно. Требаше, вториот пат кога во негови раце стигнаа амандманите да ги потпише, бидејќи Македонија е држава со парламентарна демократија и покрај одбивањето на Иванов, договорот е во сила. Секако, постои и Уставниот суд, вели Џафери.
Прашан за барањата од грчката опозиција да биде доставена целата содржина на македонскиот Устав, Џафери вели дека во однос на нашите обврски, до грчкото МНР и Парламентот испратени се уставните амандмани и Вербална нота, а дополнително не било побарано нешто.