На покана од претседателот на Собранието на Република Албанија, Грамоз Ручи, делегација предводена од претседателот на Собранието на Република Македонија, Талат Џафери е во официјална посета на Република Албанија. Во состав на делегацијата се пратениците кои се воедно и членови на Групата за соработка со Парламентот на Албанија, Ејуп Алими, Бети Рабаџиевска Наумовска и Реџеп Мемеди.
Претседателот на Собранието беше дочекан со високи државни почести на аеродромот во Тирана, а првата средба на оваа официјална посета се оствари со домаќинот Ручи.
Тој рече дека Албанија е силен поддржувач на Македонија во однос на интеграцијата на земјата во НАТО. Што се однесува до евроинтеграциските процеси, двете земји треба взаемно да се поддржуваат бидејќи иднината на целиот регион е влез во големото европско семејство.
„Претседателот Џафери истакна дека, за него претставува особена чест да оствари официјална посета на пријателска Албанија, со која имаме одлични билатерални и мултилатерални односи и потенцираше дека парламентарното мнозинство се залага за добрососедска политика и евроатланска интеграција. При тоа, ја поздрави поддршката што Република Албанија како членка на НАТО и ја дава на Република Македонија“, соопшти собраниската прес-служба.
Ручи истакнал дека се посветува посебно внимание на малцинствата кои живеат во Албанија, а за тоа добар пример е македонското малцинство во Пустец.