Двојно повеќе работа има брзата помош во Кавадарци поради топлото време, информира Антоан Паракеов, началник на Службата за итна медицинска помош при кавадаречкиот Здравствен дом.
Регистрирани се и чести повреди на нива, кога лозари поради невнимателност и недоволна заштита се повредуваат со српови додека сечат ластари во лозовите насади, а повредени има и во градежништвото.
Паракеов информира дека поради временските услови зголемена е смртноста кај хронично болните и постарите лица, кај кои доаѓа до здравствени компликации. Појасни дека е зголемен обемот на работа без разлика дали станува збор за посета на службата или за повици на бесплатниот телефонски број 194.
– Преку ден има пациенти со колапси и пад на крвниот притисок, како и проблеми со дишните патишта и зголемена телесна температура поготово кај детската возраст, рече Паракеов кој додаде дека има и зголемен број на сообраќајки, како и стомачни вируси проследени со повраќање и дијареја.
Тој ги повтори препораките кои важат во услови на жештини, без потреба да не се излегува надвор од 10 до 17 часот, да се носи лесна и светла облека, да се заштити кожата со крем со заштитен фактор, да се носат капа и очила, а екстремитетите да бидат што е можно повеќе покриени.